Baankiin Hojii Gamtaa Oromiyaa Fakkeenya Faaynaansii Hammataa Ta’uun Isaa Ragaa Bahameera.

‘Jijjiiramaan Dursaa’ Jedhamuun Jajameera.

Baankiin Hojii Gamtaa Oromiyaa kabaja hundeeffama isaa waggaa 20ffaa, bakka maamiltoonni baankichaa, gahee qabeessota, itti gaafatamtoonni hojii mootummaa fi affeeramtoonni kanneen biroo bakka argamanitti, Hoteela Sheraatanitti sirna ho’aan kabajeera. Kabaja ayyaana kanaa irratti kan argaman, Bulchaan baankii Biyyoolessaa Itoophiyaa Kabajamoo Ob. Maammoo Mihiratuu, Baankiin Hojii Gamtaa Oromiyaa biyya keenyatti baankolee guddina saffisaa galmeessisan, tajaajilawwan kalaqaa beeksisanii fi kan hawaasa giddugaleeffatan  keessaa tokko ta’uu eeranii, caaseffama tarsiimo’aa qabuu fi ilaalcha ce’umsaaf qabuun hojimaata baankii jaarraa 21^ffaaf fakkeenya ta’uu akka danda’u dubbii isaanitiin ibsaniiru.

Tajaajila waaletii /mobaayilaa/ qabu Kooppeey I-birriin kan qaqqabe, maamiltoota Miiliyoona 17n daddabarsa Qarshii Tiriliyoona 3 karaa mobaayilaa taasifame, sadarkaan raawwii isaa waaletiiwwan mobaayilaa biyyattii keessa jiran keessaa warra adda duree ta’an keessaa tokko ta’uu isaa fi karaa tajaajila liqii dijitaalawaa wabii maleessaa ‘Michuu’ daldalawwan maaykiroo, xixiqqaa fi giddugaleessaa Miiliyoona 1.2 ol maallaqaan utubuun maalummaa dhaqqabummaa faaynaansii jijjiiruun fakkeenya calaqqisaa tajaajila faaynaansii hammataa ta’uu danda’eera, jedhaniiru. Bulchaan Baankii Biyyoolessaa itti dabaluudhaanis, sonawwan baankichaa mul’ata Baankii Biyyoolessaa Itoophiyaa waliin kan wal siman ta’uu isaaniitiin, dinqisiifatanii, “jijjiiramaan dursaa” jechuun baankicha jajaniiru.

Hojimaata isaa babal’isuun hunda hirmaachisaa ta’uu hojiin kan mul’ise Baankiin Hojii Gamtaa Oromiyaa kaayyoo ‘Hawaasa Humneessuun Sadarkaa Jireenyaa Jijjiiruu’ ofduraa qabu kalaqa dijitaalawaa olaanaan kan deeggarame ce’umsa dijitaalawaa dhugoomsuu irratti kan argamu ta’uu dubbii isaaniitiin kan beeksisan, Hoji-Raawwachiisaan Olaanaa baankichaa Ob. Darribee Asfaaw, teknoloojii irratti xiyyeeffachuun tajaajilawwan dijitaalawaa rakkina hawaasaa furanii fi jireenya salphisan hojiirra oolchuuf kutannoon hojjatamaa akka jiru addeessaniiru.

Baankichi hoji-uumtota mul’ataa fi abdiin guutamaniif liqii Michuun Qarshii Biiliyoona 20 qabsiisa malee kenne, karaa Faarm Paasii kan raawwataman daddabarsi Qarshii Miiliyoona 440 ol ta’an, hojiirra oolmaan hojimaata dijitaalawaa waldaalee fi yuuniyenoota qusannoo fi liqii SACCO-Link, ATM ammayyaawaan yeroo gabaabaa keessatti olkaawwannaan Qarshii Biiliyoona 6 taasifamuu, giddugala isaa kalaqa teknoloojii dijitaalawaatti, baankii fi qaamolee biroo waliin walta’uun tajaajilawwan hedduu bocuun, ‘Tajaajilaa Qophee’ ta’uun, Dameelee Ismaartii hojiirra ooluun, Dameeleen Iikoo human haaromfamaan hojjatan, uumama naannoo waliin wal siman babal’achuu, saffisaa fi kaffaltii xiqqaan tajaajila kan kennan kan akka Faast Peeyii fi biyya keenyaaf isa jalqabaa kan ta’e, hojiirra oolmaa teknoolojii Bilookcheeyniin kan hojjatu KoopRemiit, baankichi toora dijitaalawaan guddina mul’ataa agarsiise kan agarsiisu ta’uun isaa beekameera. Yeroo ammaa kanatti, saffisa olaanaan guddachuun, qabeenyi isaa waliigalaa Qarshii Biiliyoona 189.4 kan ta’e, maallaqni olkaawwannaa qabus ji’oottan 9n darban walitti qabame Biiliyoona 52.3 dabalatee Qarshii Biiliyoona 169.45 kan qaqqabe, baay’inni maamila Miiliyoona 14.5 ol  kan qabu, abbaa dameelee 745 fi hojjachiisaa lammiilee 15,000 ol kan ta’e baankii daran guddaa ta’uu danda’eera.

Baankichi ‘Pirojaktii 20 kabaja waggaa 20^ffaaf’ mataduree jedhuun, hojiilee hawaasaaf bu’aa buusan gara garaan ji’a tokkoof kabajamaa akka ture ni beekama.